نصائح وخبرات للعاملين فى مجال ال IT من الواقع

نصائح وخبرات للعاملين فى مجال ال IT من الواقع

السلام عليكم

خلال الشهر الماضى كان لدى مهمة اختيار موظفين جدد للشركة – وتم عمل اعلان عن الخبرات والمواصفات التى يجب ان تكون فى المتقدم لتلك الوظيفة

وخلال هذة الفترة انهالت عليا عشرات ال CVs وعملت مقابلات مع بعضهم بالفعل

كل هذا طبيعى حتى الان لكن كان الغريب بالنسبة لى انة كان يوجد بعض النقاط الخاطئة والغريبة التى قابلتها فى هذة التجربة

وسوف احاول ان اسرد بعضها هنا – انا لست من بتوع التنمية البشرية ولا اازاى تكتب ال CV الخاصة بك ولا الكلام دة وليس لى خبرة فى الموضوع – لكن حبيت اوضح بعض الغلطات التى قابلتها كنصيحة من وجهة نظرى فقط وليس كقاعدة علمية

• ليس من الذكاء ان ترسل ال CV الخاصة بك لوظيفة انت ليس لك علاقة بها من قريب او من بعيد مثلا ( مطلوب شخص خبرة 5 سنين وانت خريج العام الماضى ) وقيس على هذا الكثير عشرات ال CVs من جميع الاشكال والالوان مع ان متطلبات الوظيفة واضحة جدا للجميع .
• لست احتاج الى صورتك الرائعة واخدة صفحة كاملة من ال CVs – احنا مش شركة اعلانات ولا طالبين مضيفين
• موضوع شهادات الخبرة وشهادات الحضور وشهادات حضور كورسات انجليزى وغيرها ليس لها قيمة اطلاقا مع اى شركة محترمة ( هتنفعك وانت عاوز تسافر برة مصر مع مكاتب السفريات والدول العربية )
• من حقك تكتب انك معاك مليون شهادة وحضرت مليار كورس وانا مش هسالك هما فين – لكن الاهم انك تبقى فاهم اللى حضرتة ودة بيبان فى المقابلة فى دقيقتين وشوفت فضايح
• لبسك وشكلك ملوش قيمة فى مجالنا IT – وطبيعة شغلك مش محتاجة شكل معين – موضوع البدل والحاجات دية ملوش اى قيمة وبالذات فى المستوى اللى احنا بندور فية – lممكن تنفعك لو هتشتغل فى مكان فى احتكاك بعملاء او تبقى مدير مشروعات ودة مش معناه ان يبقى مظهرك سيئ
• متكتبشى حاجة فى ال CV الا اذا كنت عارفها ومش لازم تاخد Copy and Past من CV بتاع صاحبك او حد اكبر منك وانت مش عارف فيها اية ولما اقولك انت كاتب شئ معين فيها تقولى فين وازاى
• مش معنى انك حضرت كورس او دخلت امتحان تبقى خلاص بتفهم فى هذا الموضوع – احنا مش حكومة عاوزة شهادات – احنا عاوزين حد فاهم وبيعرف بيشتغل مش يعلق شهاداتة على جدران الشركة
• لو فية سؤال مش واضح او اختصار وانت متلخبط اسال متنكسفشى فى المقابلة
• لو فية سؤال مش عارف اجابتة قول مش عارف مش لازم تفتى وتفتكس من دماغك وكانك داخل لعبة حظ ويمكن تطلع الاجابة صح

دية بعض النقاط اللى فاكرة واللى قابلتها وحبيت انبه الناس لتفاديها مستقبلا ولاحظوا انا بتكلم على مجال ال IT يعنى بعض النقط دية مناسبة لمجالات اخرى ونقط قوة مش ضعف – كل مجال لة متطلباتة وحتى كل دولة وثقافة ليها شروطها لكنى بتكلم عن تجربة وخبرة شخصية وليس شئ يعمم على الكل

ولى كام نصيحة بصفة عامة اتعلمتها خلال حياتى العملية وخبرتى القليلة فى الحياة هقولها يمكن حد يستفاد بيها وزى ما قولت دية رؤية شخصية وليست قواعد ونظريات ومبادئ – فممكن يكون منها الصحيح والخاطئ ولك الاختيار بالاخذ بها او نسيانها

• التخصص شئ مهم جدا فى مجالنا ( ممكن تتخصص فى مجالين مرتبطين ببعض او واحد مركز فية ومجال بيخدم علية او  انك تبقى فاهم مبادى التخصصات الاخرى للاستفاد منها لعمل مشروع تطويل لشركتك او لشركة اخرى) لكن بتاع كلة دة مش بينفع فى الشركات الكبيرة ومناسب فقط فى الشركات الصغيرة وعمرك ما هتقدر تنتقل لشركة كبيرة وانت بتاع كلة لان دة مش بيبقى فاهم شئ معين بشكل محترف وانما واخد من تخصص جزء وفى سن ووقت معين لازم تبقى محترف فى شئ وقوى فية لان الشركات الكبيرة عاوزة تخصص لكى يكون محترف فى التعامل مع المشاكل
• السؤال الازلى والتى سوف يستمر الى يوم القيامة : اتخصص فى اى مجال ( شبكات ولا داتا بيز ولا برمجة ولا جرافيك ولا سيستم ولا فيرجوال وغيرها ) انا اجابتى واحدة لكل من سالنى هذا السؤال وهى انك تشوف اللى انت شايف نفسك هتنجح فية وشايف انك هتقدر تكمل فية وحابة ( اعمل الصح)
• سيبك من كلام القهاوى الجميل والقعدات الحلوة وتسمع فيها ابو العريف ويقولك انت لو خدت الشهادة دية هتتخطف وانت لو عرفت البرنامج دة هتسافر برة ومش هيكون فية ذيك وابن خالتى خد الكورس دة وبياخد بالدولار برة الان – للاسف الالاف انضحك عليهم بالكلام دة كتير قوى
• كل التخصصات مطلوبة ومش هتتلغى ولا هتنقرض وانما بتتطور ولازم تواكب تتطورها المهم انك تبقى قوى فى التخصص اللى هتدخل فية ومتميز فية
• الشهادات والكورسات مش بتعمل شخص محترف ولية خبرة فى الواقع ابنى انت خبرتك بنفسك وطبق كل اللى اتعلمتة فى البيت اشترى اجهزة وطبق ومتقولشى ممعيش فلوس بناقص الموبيل الاخر موديل والسجاير والخروجات واصرفهم على شئ هيغير حياتك كلها (استثمر فى نفسك)
• العمل الاول ولا الخبرة الاول – دية زى البيضة ولا الفرخة الاول – بص نصيحة اعمل اللى عليك وذاكر وطبق وافهم كويس اللى تعلمتة ووقتها هتعمل انت الخبرة والعمل هيجيلك – متقلقشى مجهودك عمرة ما هيضيع ببلاش دة رزق بتاع ربنا
• متخدشى شهادة وكورسات بالعبيط وتقعد تلطم زى الولاية انك مش لاقى شغل – اسال نفسك انت بتعرف تعمل اية – مجالنا غالبيتة العظمى قطاع خاص فعاوز واحد فاهم مش جايب شوية ورق شهادات وحضور – دة مش معناه انك مش تاخد شهادات وتمتحن لكن افهم اللى بتاخدة مش تبقى ورقة وخلاص
• موضوع العمل دة رزق فى الاول والاخر من عند ربنا فهتقابل ناس اقل منك كتير وحمير بمعنى الكلمة وشغالين فى اماكن كويسة فمتزعلشى دة رزق ونصيب
• المرتب مش لازم يبقى هو معيارك فى العمل – ممكن تروح مكان بمرتب صغير بس تتعلم ومن المكان دة هتروح لمكان اكبر – لان المكان الكبير ابو مرتب كبيرة عمرة ما هياخدك وانت جديد – هى سلالم بتطلعها
• ممكن تروح عمل جديد بمرتب اقل من مرتبك السابق لكن الاهم تحسبها مش فلوس تحسبها خبرة واسم هتاخدة ودة هيجيبلك فلوس ومرتب اكبر من العملين السابقين
• دائما لما تقدم على وظيفة جديدة مش تبص تحت رجليك – احسبها انت هتكون بعد 5 سنين فين وانت فى وظيفتك الحالية وانت فى وظيفتك الجديدة وقارن وعلى اساسها اختار – احنا مش بنعرف الغيب لكن بتوكل على الله
• عمرك وخبرتك نقطتين مهمين فى مجالنا بالذات – بمعنى محدش هيقبل يشغل واحد Helpdesk عندة 30 او 35 سنة او عندة خبرة 15 سنة فيها – لان اللى عندة 3 سننين فى هذة الوظيفة هيقوم بنفس مهامها وهيكون عندة قابلية للتعلم احسن منك وكمان هياخد مرتب اقل وانا كصاحب شركة مش هستفاد ب 15 سنة دول فى شغل الويندوز والاوفيس ( انا قابلت ناس فى هذا السن والوظيفة فى الواقع كتير وهذا ليس تخيل وانما واقع ومثال حى )
• لذلك لازم تطور من نفسك باستمرار حتى ولو شغلك او وظيفتك الحالية مش عاوزة كدة احنا مش موظفين حكومة هتترقى بالاقدمية وانما انت هتطور نفسك لوظيفة احسن وافضل فى مكان تانى متسبشى نفسك للظروف وتانتخ وتقضيها والعمر يسرقك ( للاسف قابلت واعرف ناس كتير حصلهم كدة )
• مجالنا عاوز الشخص اللى بيطور نفسة باستمرار ويتابع الجديد باستمرار بغض النظر عن احتياجة لية حاليا فى وظيفتة خليك دائما على اطلاع على التكنولوجيا ودة مش هيكلفك شئ الا شوية وقت كنت بتضيعهم فى اللعب او على القهوة او فى الكلام فى السياسة
• مصادر التعلم اصبحت كتير وسهلة جدا عن زمان ( فيديوهات عربى وانجليزى كتير متوفرة والبرامج متوفر وممكن تحصل على كل دة شبة مجانا) بس انت ابدء وتوكل على الله واتعلم – والناس اللى عايشة فى دور ان مفيش وقت دول وانهم مشغولين خليكم زى ما انتوا مفيش منكم امل لانك انت اللى محسس نفسك بكدة مش اكتر
• من خلال تجربتى الشخصية فى عمل مقابلات ومحاضرات لل VMUG دائما كان الناس ذوى الخبرة الكبيرة والحاصلين على اعلى الشهادات وبيعملوا فى اماكن مرموقة للغاية هم اكتر ناس عندهم وقت ولما اتفق معاهم على ميعاد يوافقوا علية بدون شكوى او اعتراض – وبالعكس تماما ناس عاديين وبيشتغلى فى اماكن اقل بكتير لما تكلمهم يحسسك انه اهم شخص فى العالم ومشغول دائما ومفيش وقت تماما – وهذا للاسف حال الكثير منا معيش نفسة انة مشغول وعندة حاجات كتير مع انة لو شاف اية اللى بيعملة واية الاهم فالمهم فى العمل حياتة هتتغير كتير – بس زى ما بيقولوا كل واحد دماغة مريحاه

دية تعتبر بعض خواطر ونصائح من خلال خبرتى البسيطة ومن خلال تجارب شخصية ومواقف وناس قابلتها – يمكن تكون صح او خطا – فلك الاخذ بها او لا كما قلت

عن نفسى مكنتش متوقع انى هكتب كل الكلام دة الا بعد كتابة واتفاجئت بكل النقاط دية صراحة

انا حاولت انقل لكم تجارب واقعية وليست نظريات علمية وتنمية بشرية

اسف انى كتبتة بالعامية لكن الموضوع مش محتاج الى لغة فصحى ولا تزويق

ملحوظة: انا لست خبير فى كتابة ال CVs لذلك مش لازم تبعتها لى – فية ناس كتير احسن منى فى المجال دة زى مهندس محمود مجدى

اخر شئ لازم تحطة فى دماغك دائما : ان العمل دة رزق من عند ربنا ومش مطلوب منك الا انك تعمل اللى عليك وتاخد بالاسباب وطريق النجاح معروف وكل اللى بيمشى فية بينجح وربنا مش هيضيع تعبك ابدا

وبالتوفيق للجميع