General

Zakah Elelam

زكاة العلم بمناسبة رمضان وزكاه الفطر والعيد حبيت اتكلم عن موضوع مهم جدا للجميع بغض النظر عن اتجاهه او عملة او دراستة وعاوزكم تتحملونى للاخر هو لية الناس مش بتزكى عن علمها اللى ربنا اعطاه ليها زية زى المال فية ناس طبعا هتقول هو فية شئ اسمة زكاة العلم ؟ نعم فية شئ اسمة زكاة […]

Published

on

زكاة العلم

بمناسبة رمضان وزكاه الفطر والعيد حبيت اتكلم عن موضوع مهم جدا للجميع بغض النظر عن اتجاهه او عملة او دراستة وعاوزكم تتحملونى للاخر

هو لية الناس مش بتزكى عن علمها اللى ربنا اعطاه ليها زية زى المال

فية ناس طبعا هتقول هو فية شئ اسمة زكاة العلم ؟

نعم فية شئ اسمة زكاة العلم ولة اصل شرعى ودينى وفية حديث شريف له علاقة بهذا الموضوع وهناك فتاوى كثيرة عن زكاة العلم وهديكم شوية روابط تقروا هذا الموضوع من زاوية دينية

http://fatwa.islamweb.net/fatwa/index.php?page=showfatwa&Option=FatwaId&Id=248173

http://ar.islamway.net/fatwa/20611/%D9%88%D8%AC%D9%88%D8%A8-%D8%B2%D9%83%D8%A7%D8%A9-%D8%A7%D9%84%D8%B9%D9%84%D9%85

http://majles.alukah.net/t90730/

طيب نرجع لموضوعنا من الناحية الدنيوية ووضعنا الحالى فية

مما لا شك فية ان اغلبنا لا يقوم بعمل هذة الزكاه اذا كان يعرفها من الاساس

طيب لو نظرنا عن اسباب عدم نشر العلم التى تعلمتة ولو القليل منة للفائدة وكسب الحسنات وكزكاه عنة :

هنلخصها فى هذة الاسباب :

1 – الثقافة المجتمعية : بمعنى ان مجتمعنا العربى يفتقر الى ثقافة العطاء والمساعدة ومساعدة الاخرين والتبرع لمشروعات وافراد وغيرها ( اللى اقصدة هنا مساعدة مشاريع علمية والمساعدة بنشر العلم ولو بالمال) لا اقصد هنا مساعدة الفقير والمساكين واليتامى

2- نظرة المجتمع : يوجد ناس كتير بشوفها عندها النية فى عمل مقالة او فيديو لشرح موضوع ومساعدة الناس – لكنة بيخاف نظرة الناس لية فية ناس بتتهم هؤلاء بانهم عاملين هذة المواضيع للشهرة والنفاق والتربح

3- الخوف من الفشل : عدم ثقة الشخص فى قدراتة وعلمة وخايف ان مقالة يبقى شئ تافهة او خطا – أقراء تحت فى نهاية المقال يعنى اية صاحب علم-

4- الوقت : ديه الحجة اللى بيقولها الجميع عندما تدعوة للمساعدة بعلمة ويقول انة مش فاضى وطبعا انا مش هقول انة بيتهرب او بيكذب ( ربنا يعين الجميع على اعبائة ) . لكن مش صعب ان يكون عندك ساعة واحدة فقط كل اسبوع لكتابة مقالة او مرة كل شهر لعمل فيديو قصير

لو نظرنا لهذة الاسباب من وجهة نظرى المتواضعة – ويمكن يكون هناك اسباب اخرى – هنجد انها كلها اسباب واهية وضعيفة لعمل شئ لنفسك اولا ثم للاخرين وبركز على كلمة لنفسك اولا مرة اخرى لان عمل الخير دائما يرجع لصاحبة باكثر مما قام باعطاءة

واضرب مثال على ذلك – زكاة المال –هى انك بتعطى جزء من مالك للغير يعنى مالك بيقل عمليا – لكن لو نظرنا بنظرة اوسع هنجد انك اولا بتعمل خير لمساعدة المحتاج وقمت بعمل فريضة سوف تاخذ عنها ثواب وتاكد فى النهاية ان الله سوف يرزقك باكثر مما قمت بانفاقة يعنى انت الكسبان فى النهاية فهى لك وليس عليك ( انا مقدر ان القليل ممكن يفهم هذة النقطة) فعديها ومتتعبش نفسك فى التفكير

وبشكل شخصى كتير من الناس كان تقولى انت لية بتعمل موقع وتصرف علية فلوس للهوست والدومين وواحد يعمل تصميم غير شراء اجهزة لعمل الكورسات غير طبعا الوقت لعمل كل دة – للاسف الشديد بلاقى ناس مهندسين كبار بيقولوا لى هذا الكلام

وهذا بسبب النظرة الضيقة لهم انهم متعودين انهم لما يعملوا شئ ياخدوا مقابل والمقابل يبقى مباشر وعلى المدى القصير وعمرهم ما فهموا يعنى اية زكاه علم او ان هيكون فية مقابل لكن على المدى الطويل ( المقابل هنا مش لازم فلوس ممكن يكون دعاء من شخص استفاد بعلمك او كسب حب الناس غير طبعا والاهم المقابل الذى سوف يعطيك الله لك ) اسف لو مش مستوعب برضوا قصدى بس انت دماغك اكبر من هذا الكلام ونصيحة كفاية عليك كدة قراءاه واغلق الصفحة وشوف مسلسل افضل

وفية ناس بتقول ان الناس اللى بتكتب مقالات وكورسات ومواقع لمساعدة الناس دول عاوزين شهرة وهدفهم المال فقط ( مع ان دة فى حد ذاتة مش عيب ان الشخص يكسب من مجهودة ) لكن انا هرد عليهم احنا لو نظرنا الى اغلب الناس اللى بتعمل كورسات او مقالات لنشر العلم هتجدهم اولا مش بييعوا اى منتجات او شئ – مع ان دة ايضا مش عيب ولا حرام ان اى شخص يبيع شئ تعب فية – لكن انا بس حبيت ارد على نوعية ناس اقل وصف ليهم انهم مرضى نفسيين وهدفهم دفع الناس للفشل وتشوية الصورة ( طبعا انا مش بقصد الناس اللى فى بالى بالك بس انا قلت لهم اغلقوا الصفحة وهما لسة بيقراء)

 

ولى تجارب شخصية كثيرة مع هذة الشخصيات وبقابلهم كثيرا واصبح ردى عليهم هو التجاهل لانهم اقل من ان اضيع وقتى وارد عليهم

منذ عدة شهور حدث لى موقف خلال مقابلة لعمل فى احدى الدول العربية فى مكان كبير جدا ومهم فى الدولة بدون ذكر اسماء وكان المفترض ان اللى بيعمل معايا المقابله على التليفون هو المدير طبعا كما هو اضح انة لا يفقة شئ فى ال IT وهذه ليست المشكلة

المشكلة عندما قالى هو انت بتشتغل Consultant or Trainer and Blogger انا رديت علية انى بعمل الاتنين الاولى لانها عملى والثانية بهدف الزكاه عن علمى – طبعا هو مش رد بعدها

انا بحاول اضرب على نفسى الامثلة لانها من الواقع والتجربة وليس احكام وافتراءات – فاعذرونى انى بتكلم عن نفسى –

طيب بعد كل هذا الكلام الكتير دة هل فية حل او هنلاقى ناس هتبدا فى مساعدة الناس فى نشر علمهم ؟

هكون صريح معاك مع انى من النوع المتفائل بطبعة لكن كلامنا دة كلة ولا هيفرق شئ ولا هيغير شئ من الواقع على الاقل على المدى القصير والمتوسط ونأمل ان يكون التغيير على المدى الطويل فى الاجيال القادمة

واتمنى من مقالى هذا ان يؤثر فى البعض ومنهم كثير اصدقائى واعضاء فى الجروب والموقع وهيقراوا هذا المقال وهم اصحاب علم وتعلمت منهم الكثير ولا اعتبر نفسى شئ بجوارهم ان يبدوا فى التفكير مرة اخرى وبشكل مختلف فى علمهم وان العلم اللى ربنا رزقهم بية مش فقط لكسب المال والوظيفة وانما ايضا لمساعدة الاخرين بة

فى النهاية محدش يزعل من كلامى اذا كان عنيف بعض الشئ لكن هذة هى الحقيقة ولا تحتاج ان تتجمل – ويجب ان نواجها كما هى لكى نستطيع ان نتعامل معها ونجد لها حلول

وايضا انا لا اقصد شخص بعينه وانما اقصد كل صاحب علم ولا يزكى  عنة

للتوضيح : كلمة صاحب علم هنا لا اقصد بها شخص عبقرى او اسطورة وانما صاحب العلم هذا ممكن ان يكون شخص تعلم معلومة واحدة فقط ويمكن ان يزكى عنها بتشرها للناس لانها مهما تكون بسيطة وعادية هتجد ناس كتير مش تعرفها

فلا تستهتر بنفسك او بعلمك مهما كان قليل هناك الاقل منك فى العلم

وكلما تعلمت اكثر كلما تاكدت ان علمك هذا لا شئ وانت لا تعرف شئ  وهناك افضل منك الكثير

مش هتعبكم اكثر من كدة فى هذا الموضوع الطويل وشكرا للناس اللى اهتمت وقراءت الموضوع للنهاية لان هم دول الناس اللى ممكن يطلع منهم شئ

وكل عام وانتم بخير بمناسبة العيد

2 Comments

Trending

Exit mobile version